صيت فقر ولا صيت غنى..

صيت فقر ولا صيت غنى..

غنى..

مابعرف ليش هيك صايرة العالم..كلو عم (يكمكر)وكلو عم (يتنتن)..وماعاد حدا فرد ايدو متل رجال زمان..
كان الواحد يفتخر أنو الله رازقو..وواهبو من كَرَمو..مشان هيك..بتلاقيه عم يزكي ويساعد الناس.. وعم يعطي بسخاء لكل محتاج..وما عم يرد أي شخص عم يدق بابو..سواء قرضة ..أو مساعدة..أو حتى لوجه الله تعالى...وينبسط لما يقولوا عنو الناس فلان غني..امشوا نطلب منو مساعدة ما بردنا!! ..وهالفلان..تلاقيه بكل ود ومحبة وصدر رحب يستقبل هالناس اللي قاصدة الله ومن ثم قاصدتو..ويقلك معلش عيوني ..صيت غنى ولا صيت
فقر..
من كتر ما الفقر بيدبح وبيذل..وما يخلي حدا يطلع من عندو مكسور الخاطر..

بس للأسف هالأيام اللي عايشينا..كأنو انعكست الآية..

صرت تروح لعند الغني اللي الله رازقو..وأول ما يشوفك على بابو..يفهم طلبك..وفوراً يدوّر هالأسطوانة المعروفة..

اييييييييييييه..والله مافي حركة..الناس ميتة..في جمود مو طبيعي بالبلد..اذا ما اشتغلنا ما عم ناكل.. والله صرلنا انا والمرة والولاد..اسبوعين عالزعتر..والمسبحة..مشتهيين اللحمة تفوت على بيتنا.. الجاج عم نحلم فيه حلم..وعلى هالمقياس ..قيس..بتطلع انت بعد سلسلة الشحادة اللي رواها ادامك..بتحن عليه ..ويمكن تطالع من جيبتك 200 ل.س شقفة وحدة وتجبر بخاطرو.. وبتطلع من عندو مكسور الخاطر..دمعتك محبوسة بقلب الب عيونك .. والحسرة على حالك عم تاكلك أكل..وهادا غير ندب الحظ..والذي منو..

ولما بتجي مرتو وبتسألو:ليش هيك عملت يا رجال؟؟كسرت بخاطر الزلمة..(أو أخوك..أو رفيق عمرك) والله بحياتو ما قصر معك..ولا مع ولادك..بقلا جوزا بفهم وثقة..(على أساس يعني)..حطي بالخرج يا مرة..هالأيام صيت فقر ولا صيت غنى..أنا ومن بعدي الطوفان..

ياترى ..شو هالوقت اللي وصلنالو..معقولة نحنا بآخر وقت..لاعاد أخ سأل على أخوه..ولاعاد ابن سأل على أبوه أو أمو..تخيلوا ..

من مدة رحت لزور واحد رفيقي..مريض بالريقان..وانا عندو أجت والدتو الله يخليلكن أمهاتكن يا رب..ويرحم أمي..أجت لتعطيه الحبة وحاملة بإيدا كاسة المي..آم هو ما رضي ياخد الدوا ..وهيي أصرت انو تعطيه الدوا وهي عم تقلو...الله يرضى عليك خدا مشان تطيب وتشفا!!بتعرفوا شو جاوبا؟؟..بعد ما ضرب أيدا ورما الحبة وكاسة المي..بكل لئم..وقسوة..إذا الشفا من إيدك ما بدي ياه..!!انا لما سمعت هالحكي استأذنت منو ..ورحت..ومن وقتا لليوم ماعاد حاكيتو ابداً..إذا لأمو اللي تعبت فيه ما في خير..لألي رح يكون في خير..بجوز هالقصة مالا علاقة بموضوعنا..بس حبيت فرجيكن لوين وصلنا ..وأسألكن لوين بدنا نوصل ..شي غريب!!..
أيييييه..والله يمكن المخفي أعظم..وأودعناكن.

--------------
-------